ଭୁବନେଶ୍ୱର : ପୂର୍ବ ଘୋଷଣା ଅନୁଯାୟୀ ରାଜ୍ୟ ସରକାର ଆଜି ସମସ୍ତ ଡିଗ୍ରୀ କଲେଜର ପରିଚାଳନା କମିଟିକୁ ଭାଙ୍ଗି ଦେଇଛନ୍ତି। ତେବେ ସମସ୍ତ ସ୍ୱୟଂଶାସିତ କଲେଜ ଓ ସଂଖ୍ୟାଲଘୁ ସମୁଦାୟ ଦ୍ୱାରା ଗଠିତ କଲେଜଗୁଡ଼ିକ ଏହି ନିଷ୍ପତ୍ତିରୁ ବାଦ୍ ପଡ଼ିଛନ୍ତି। ପରିଚାଳନା କମିଟିକୁ ଭାଙ୍ଗିବା ସହ କଲେଜଗୁଡ଼ିକର ପରିଚାଳନା କମିଟି ସଭାପତି ଭାବେ ଅତିରିକ୍ତ ଜିଲ୍ଲାପାଳ ଓ ଉପଜିଲ୍ଲାପାଳମାନଙ୍କୁ ନିଯୁକ୍ତି ଦିଆଯାଇଛି। ତତ୍କାଳ ପ୍ରଭାବରୁ ଏହି ନିର୍ଦ୍ଦେଶ କାର୍ଯ୍ୟକାରୀ ହେବ।
ସେହିପରି ଯେଉଁ କଲେଜଗୁଡ଼ିକ ଜିଲ୍ଲା ମୁଖ୍ୟାଳୟ ବାହାରେ ଅଛି ତା’ର ପରିଚାଳନା କମିଟି ସଭାପତି ଦାୟିତ୍ୱ ଉପଜିଲ୍ଲାପାଳ ତୁଲାଇବେ। ଆଜି ତତ୍କାଳ ପ୍ରଭାବରୁ ଏହି ନିର୍ଦ୍ଦେଶାନାମାକୁ କାର୍ଯ୍ୟକାରୀ କରିବା ପାଇଁ ବିଜ୍ଞପ୍ତିରେ କୁହାଯାଇଛି। ରାଜ୍ୟପାଳଙ୍କ ଅନୁମୋଦନକ୍ରମେ ରାଜ୍ୟ ଉଚ୍ଚଶିକ୍ଷା ବିଭାଗ ପକ୍ଷରୁ ଏହି ବିଜ୍ଞପ୍ତି ଜାରି ହୋଇଛି।
ସୂଚନାଯୋଗ୍ୟ, ରାଜ୍ୟର ସମସ୍ତ କଲେଜର ପରିଚାଳନା କମିଟି ସଭାପତି ଦାୟିତ୍ୱରୁ ବିଧାୟକମାନଙ୍କୁ ହଟାଇବା ପାଇଁ ରାଜ୍ୟ ସରକାର ବହୁଦିନରୁ ନିଷ୍ପତ୍ତି ନେଇଥିଲେ। ‘ଓଡ଼ିଶା ରିପୋର୍ଟର’ ଏହି ଖବରକୁ ପ୍ରଥମେ ୨୦୧୯ ଡିସେମ୍ବର ୩୧ତାରିଖରେ ପ୍ରକାଶ କରିଥିଲା।
