#ମଣ୍ଡିରୁ_ଉଠୁନି_ଧାନ,_ବିଧାନସଭା_ଅଚଳ_୧୬ଥର_ମୁଲତବୀ ଭୁବନେଶ୍ୱର : ମଣ୍ଡିରେ ହଜାର ହଜାର କ୍ୱିଣ୍ଟାଲ ବସ୍ତା ଧାନ ପଡ଼ିରହିଥିବା ପ୍ରସଙ୍ଗକୁ ନେଇ ଆଜି ବିରୋଧୀ ଦଳ ଗୃହକୁ ଅଚଳ କରିଦେଇଛନ୍ତି। ବାଚସ୍ପତି ସୂର୍ଯ୍ୟନାରାୟଣ ପାତ୍ରଙ୍କ ଦ୍ୱାରା ସର୍ବଦଳୀୟ ବୈଠକ ଓ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ଦ୍ୱାରା ବିଧାୟକମାନଙ୍କ ସହ ବୈଠକ ସତ୍ତ୍ୱେ ଗୃହ ସ୍ୱାଭାବିକ ଅବସ୍ଥାକୁ ଫେରିନଥିଲା । ବିରୋଧୀ ସଦସ୍ୟଙ୍କ ହଟ୍ଟଗୋଳ ଯୋଗୁ ଆଜି ଗୃହକାର୍ଯ୍ୟ ମୋଟ୍ ୧୬ଥର ମୁଲତବୀ ହୋଇଛି ଓ ଶେଷରେ ଗୃହକୁ ଆସନ୍ତାକାଲି ପୂର୍ବାହ୍ନ ସାଢେ଼ ୧୦ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଛନ୍ତି।
ଆଜି ବିଧାନସଭା ଅଧିବେଶନ ଆରମ୍ଭ ହେବାମାତ୍ରେ ଉଭୟ କଂଗ୍ରେସ ଓ ବିଜେପି ସଭ୍ୟମାନେ ମଣ୍ଡିରେ ଧାନ ପଡ଼ି ରହିଥିବା ପ୍ରସଙ୍ଗକୁ ନେଇ ହଟ୍ଟଗୋଳ କରିଥିଲେ। ସେମାନେ ଏହି ପ୍ରସଙ୍ଗରେ ଦେଇଥିବା ମୁଲତବୀ ପ୍ରସ୍ତାବ ଉପରେ ଆଲୋଚନା ପାଇଁ ଦାବି କରିଥିଲେ। ମାତ୍ର ବାଚସ୍ପତି ଶ୍ରୀ ପାତ୍ର ଏହି ମୁଲତବୀ ପ୍ରସ୍ତାବକୁ ଗ୍ରହଣ ନକରିବାରୁ ଉଭୟ କଂଗ୍ରେସ ଓ ବିଜେପି ବିଧାୟକମାନେ ଗୃହରେ ହଟ୍ଟଗୋଳ ଜାରି ରଖିଥିଲେ। ପ୍ରଥମାର୍ଦ୍ଧରେ ଗୃହରେ କୌଣସି କାର୍ଯ୍ୟ ହୋଇପାରିନଥିଲା ଓ ବାରମ୍ବାର ଗୃହ ମୁଲତବୀ ହୋଇଥିଲା। ଦ୍ୱିତୀୟାର୍ଦ୍ଧରେ ମଧ୍ୟ ଅନୁରୂପ ସ୍ଥିତି ଲାଗି ରହିଥିଲା। ବାଚସ୍ପତି ଶ୍ରୀ ପାତ୍ର ସର୍ବଦଳୀୟ ବୈଠକ ଡାକି ଗୃହକୁ ସ୍ୱାଭାବିକ କରିବା ପାଇଁ ଉଦ୍ୟମ କରିଥିଲେ। ଏହାବ୍ୟତୀତ ଯୋଗାଣ ମନ୍ତ୍ରୀ ଶ୍ରୀ ସ୍ୱାଇଁ ମଧ୍ୟ ଧାନ ମଣ୍ଡିରେ ପଡ଼ିଥିବା ପ୍ରାୟ ୫ଟି ଜିଲ୍ଲାର ବିଧାୟକମାନଙ୍କ ସହ ବୈଠକ କରି ସମସ୍ତ ଧାନ କିଣାଯିବ ବୋଲି ପ୍ରତିଶ୍ରୁତି ଦେଇଥିଲେ। ମାତ୍ର ସେଥିରେ ବିରୋଧୀ ଦଳ ସଦସ୍ୟମାନେ ସନ୍ତୁଷ୍ଟ ହୋଇପାରିନଥିଲେ। ଯେଉଁଥିପାଇଁ ଗୃହ କାର୍ଯ୍ୟ ସ୍ୱାଭାବିକ ହୋଇପାରିନଥିଲା।
ଟୋକେନ୍ ଅବ୍ୟବସ୍ଥା ଓ ଅଦିନିଆ ବର୍ଷା ଯୋଗୁ ଚାଷୀ ନିଜର ଧାନ ସୁରକ୍ଷିତ ରଖିପାରୁନି ଓ ସରକାର ଧାନକିଣିବା ପରିବର୍ତ୍ତେ ଚାଷୀଙ୍କ ଧାନକୁ ମଣ୍ଡିରେ ପକାଇ ରଖିଛନ୍ତି ବୋଲି ବିରୋଧୀ ଦଳ ସଦସ୍ୟମାନେ ଅଭିଯୋଗ କରିଛନ୍ତି। ତେବେ ଯୋଗାଣ ମନ୍ତ୍ରୀ ଶ୍ରୀ ସ୍ୱାଇଁ କହିଛନ୍ତି ଯେ ମାର୍ଚ୍ଚ ୩୧ତାରିଖ ପର୍ଯ୍ୟନ୍ତ ଧାନକିଣା ପ୍ରକ୍ରିୟା ଚାଲୁ ରହିଛି। ଯେଉଁଠି ଧାନ ମଣ୍ଡିରେ ରହିଛି ସେଠାର ଜିଲ୍ଲାପାଳମାନଙ୍କ ସହ ଆଲୋଚନା କରି ଉପଯୁକ୍ତ ପଦକ୍ଷେପ ନିଆଯିବ। ତେବେ ବିରୋଧୀ ଦଳ ସଦସ୍ୟମାନେ ଗୃହ କାର୍ଯ୍ୟ ଅଚଳ କରିବା ପ୍ରସଙ୍ଗକୁ ବିଜେଡି ନାପସନ୍ଦ କରିଛି।
