#ନିଜାମୁଦ୍ଦିନ_ଫେରନ୍ତାଙ୍କୁ_ମୁଖ୍ୟମନ୍ତ୍ରୀଙ୍କ_ନିବେଦନ ଭୁବନେଶ୍ୱର : ଦିଲ୍ଲୀ ନିଜାମୁଦ୍ଦିନ ତବଲିଗରେ ଯୋଗଦେଇ ଫେରିଥିବା ଓଡ଼ିଶାବାସୀ ଡରନ୍ତୁ ନାହିଁ ଟୋଲ୍ ଫ୍ରି’ ନମ୍ବର ୧୦୪କୁ ଫୋନ୍ କରି ୨୪ ଘଣ୍ଟା ମଧ୍ୟରେ ସ୍ୱାସ୍ଥ୍ୟ ପରୀକ୍ଷା କରାଇ ନିଅନ୍ତୁ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶନିବାର ଅନୁରୋଧ କରିଛନ୍ତି ।ଏସମ୍ପର୍କରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଜାରି ହୋଇଥିବା ଏକ ପତ୍ରରେ ଶ୍ରୀ ପଟ୍ଟନାୟକ କହିଛନ୍ତି ଯେ କେବଳ ସଚେତନତା ଦ୍ୱାରା ହିଁ, ଆମେ କରୋନା ସଂକ୍ରମଣକୁ ରୋକି ପାରିବା । କରୋନାକୁ ଡରିବାର କିଛି ନାହିଁ, କିନ୍ତୁ ଆମକୁ ସାବଧାନ ରହିବାକୁ ହେବ ।
ମୁଖ୍ୟମନ୍ତ୍ରୀଙ୍କ ସହ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ମଧ୍ୟ ଅନୁରୋଧ କରି କହିଛି ଯେ ନିଜାମୁଦ୍ଦିନ କାର୍ଯ୍ୟକ୍ରମ ସହ ସମ୍ପୃକ୍ତ ବ୍ୟକ୍ତିମାନେ ସ୍ୱେଚ୍ଛାକୃତ ଭାବେ ୧୦୪କୁ ଫୋନ୍ କରି ନିଜ ନିଜର ଠିକଣା ଜଣାନ୍ତୁ । ଭୟଭୀତ ହେବା କିମ୍ବା କଥାକୁ ଗୁପ୍ତ ରଖିବା ଅନାବଶ୍ୟକ । ଏହାଛଡ଼ା ଯଦି ଅନ୍ୟ କେହି ବ୍ୟକ୍ତିଙ୍କ ନିକଟରେ ନିଜାମୁଦ୍ଦିନ ଫେରନ୍ତାମାନଙ୍କ ବିଷୟରେ କୌଣସି ସୂଚନା ଥାଏ ସେମାନେ ମଧ୍ୟ ୧୦୪କୁ ଜଣାଇ ପାରିବେ ।ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ସୂଚନା ଅନୁସାରେ, ରାଜ୍ୟରେ ନିଜାମୁଦ୍ଦିନ କାର୍ଯ୍ୟକ୍ରମ ସହ ସମ୍ପୃ୍କ୍ତ ୨୮ ଜଣ ବ୍ୟକ୍ତିଙ୍କୁ ଏ ପର୍ଯ୍ୟନ୍ତ ଚିହ୍ନଟ କରାଯାଇ ସେମାନଙ୍କ ସ୍ୱାବ୍ ପରୀକ୍ଷା କରାଯାଇଛି । ସେମାନଙ୍କ ମଧ୍ୟରୁ ୨୫ଜଣଙ୍କ ନମୁନା ନେଗେଟିଭ୍ ଆସିଥିବା ବେଳେ ୩ଜଣଙ୍କ ନମୁନା ପଜିଟିଭ୍ ଆସିଛି । ପଜିଟିଭ୍ ଆସିଥିବା ୩ଜଣ ବ୍ୟକ୍ତି ହେଉଛନ୍ତି କଟକ, ପୁରୀ ଜିଲ୍ଲା ର ଦାନିହିର ଓ ଯାଜପୁରର ବ୍ରହ୍ମବରଦାର ବାସିନ୍ଦା ।
