#ଗଞ୍ଜାମରେ_ବଢ଼ୁଛି_କପା_ଚାଷୀଙ୍କ_ଦୁର୍ଦ୍ଦଶା ବ୍ରହ୍ମପୁର, (ଶାନ୍ତନୁ କୁମାର ରଣା): ଗଂଜାମ ଏକ ଜନବହୁଳ ଜିଲ୍ଲା ସହ ବିଭିନ୍ନ ସମସ୍ୟା ସହ ଜର୍ଜରିତ । ସାମାଜିକ, ଆର୍ଥିକ ତଥା ଅର୍ଥନୈତିକ ଅନଗ୍ରସରତା କାରଣରୁ ଏଠାକାର ମାନବ ସମ୍ବଳ ବାଧ୍ୟ ହୋଇ ସୁରାଟ, ମୁମ୍ବାଇ, ଚେନ୍ନାଇ, ହାଇଦ୍ରାବାଦ୍, କେରଳ, କୁଏତ୍, ଦୁବାଇରେ ନିଜର ଶ୍ରମ ବିନିଯୋଗ କରୁଛନ୍ତି । ଅବଶ୍ୟ ଦାଦନ ଦୁଃଖକୁ ପ୍ରଶମିତ କରିବା ପାଇଁ ସରକାର ଏଥି ନିମନ୍ତେ କିଛି ମାତ୍ରାରେ ସଫଳ ହୋଇଥିବା ବେଳେ ବହୁ ମାତ୍ରାରେ ବିଫଳତାର ସ୍ୱାଦ ଚାଖିବାକୁ ପଡ଼ିଛି । ଏହାର ମୁଖ୍ୟ କାରଣ ହେଉଛି ଗଂଜାମରେ ଭିତ୍ତିଭୂମିର ଘୋର୍ ଅଭାବ ।
ଯଦି ଗଂଜାମର ଦାଦନର ମୁଖ୍ୟ କାରଣକୁ ଖୋଜାଯାଏ ତେବେ ଏଥି ପାଇଁ ମୁଖ୍ୟତଃ ଭାବେ ଦାୟି ହେଉଛି ଚାଷ ପ୍ରତି ଚାଷୀ ମୁହଁ ମୋଡ଼ିବା । ଏହାର କାରଣ ମଧ୍ୟ ଆମେ କର୍ମବିମୁଖତାକୁ ଦାୟୀ ଦେଲେ ହେବ ନାହିଁ । ଏଥି ପାଇଁ ଦାୟୀ ପ୍ରଶାସନ କଳ ଓ ରାଜନୈତିକ ଇଛା ଶକ୍ତି । ଯେଉଁମାନେ ପ୍ରକୃତ ଚାଷୀ ସେମାନଙ୍କୁ ଚାଷ ଜନିତ ସୁବିଧା ସୁଯୋଗ ନଦେଇ କେବଳ କୃଷି ଅଧିକାରୀମାନେ ନିଜର ପକେଟ୍ ଗରମକୁ ଚରିତାର୍ଥ କରିବା ପାଇଁ ସରକାରଙ୍କ ବିଭିନ୍ନ ଯୋଜନାକୁ ସଠିକ୍ ହିତାଧିକାରୀଙ୍କ ପାଖରେ ପହଞ୍ଚାଉନାହାଁନ୍ତି । ଯାହା ଫଳରେ ଆଜି ଗଂଜାମରେ କୃଷି ଭୂଷୁଡ଼ିବା ସହ ଦାଦନ ସମସ୍ୟାର ମୁଖ୍ୟ କାରଣ ହୋଇ ମୁଣ୍ଡ ଟେକିଛି । ତେବେ ଧଳା ସୁନା ଚାଷ (କପା ଚାଷ) ଯାହାକୁ ଧାନ ଚାଷର ବିକଳ୍ପ କୁହାଯାଏ ।
ଏଥିରେ ଗଂଜାମ ଚାଷୀମାନଙ୍କର ବହୁ ପୂର୍ବରୁ ବିଶେଷ ଭାବେ ଉପକୃତ ଓ କିଛି ଅର୍ଥନୈତିକ ଅଭିବୃଦ୍ଧି ଘଟିଥିବା ବେଳେ ଏବେ କିନ୍ତୁ ପ୍ରଶାସନିକ ଅବହେଳାର ଶୀକାର ହେଉଛି । ଗଂଜାମ କପା ଚାଷୀ ମାନେ ସଠିକ୍ ସମୟରେ ଉତ୍ପାଦନ କରୁଥିବା ବେଳେ କ୍ରେତାଙ୍କର ଅଭାବରୁ ରାୟଗଡ଼ାର ଗୁଣପୁର ଯାଇ ବିକ୍ରି କରିବାକୁ ପଡ଼ୁଛି । ଯାହା ଫଳରେ ଚାଷୀ ତାର ଉଚିତ୍ ମୂଲ୍ୟ ପାଇପାରୁନାହିଁ ଓ ନାନା ସମସ୍ୟାର ସମ୍ମୁଖୀନ ହେଉଛି । ଏହାର ମୁଖ୍ୟ କାରଣ ଗଞ୍ଜାମରେ କୌଣସି ଜିନିଙ୍ଗ୍ କିମ୍ବା ପ୍ରେସିଙ୍ଗ୍ ମିଲ୍ ନାହିଁ । ଯାହା ଫଳରେ କ୍ରେତା ମାନେ କପା କିଣିବା ପାଇଁ ପଛ ଘୁଞ୍ଚା ଦେଉଛନ୍ତି ।
ଗଂଜାମର ଆସିକା ଠାରେ ଥିବା ସ୍ପନିଙ୍ଗ ମିଲ୍ ବହୁ ବର୍ଷ ଧରି ରୁଗ୍ଣ ଅବସ୍ଥାରେ ଥିବା ବେଳେ ଗଂଜାମ ଚାଷୀ ଗୁଣପୁର ଯାଇ କପା ବିକ୍ରି କରିବାକୁ ବାଧ୍ୟ ହୋଇଛି । ଏଥି ପାଇଁ ଗଂଜାମରେ ଦିନକୁ ଦିନ କପା ଚାଷ ପ୍ରତି ସ୍ପୃହା କମିବାରେ ଲାଗିଛି । ରାଜ୍ୟ ସରକାର କୃଷି ଓ କୃଷକର ବିକାଶ ପାଇଁ ବିଭିନ୍ନ ଯୋଜନା କରିଥିବା ବେଳେ ରାଜନୈତିକ ଇଛା ଶକ୍ତି ଓ ପ୍ରଶାସନିକ କଳର ଦୁର୍ବଳତା ପାଇଁ ଗଂଜାମ ଜିଲ୍ଲାରେ କୌଣସି ଜିନିଙ୍ଗ୍ ମିଲ୍ ସ୍ଥାପନ ହୋଇପାରୁନାହିଁ କିମ୍ବା ତୃଣମୂଳ ସ୍ତରର ସମସ୍ୟାକୁ ଅଣଦେଖା କରାଯାଉଛି । ଗଞ୍ଜାମରେ ବର୍ତ୍ତମାନ ୫ଟି ବ୍ଲକରେ ୮୫୪ ହେକ୍ଟର ଜମି କପା ଚାଷ ହୋଇଥିବା ବେଳେ ୧ହଜାରରୁ ଉଦ୍ଧ୍ୱର୍ ଚାଷୀ ଓ ତାଙ୍କ ପରିବାରଙ୍କ ଜୀବନ ଜୀବିକା ଏଥିରେ ଯୋଡ଼ି ହୋଇ ରହିଛି । ବର୍ତ୍ତମାନ ସୁଦ୍ଧା ୧୬୨୭ କୁଇଣ୍ଟାଲ କପା କ୍ରୟ କରାଯାଇଥିଲେ ହେଁ ନିଜ ଖର୍ଚ୍ଚରେ ଚାଷୀ ଦୂରଦୂରାନ୍ତରକୁ ଯାଇ କପା ବିକ୍ରି କରୁଥିବା ବେଳେ ସମସ୍ୟାର ସମାଧାନ ହୋଇପାରୁନାହିଁ । ଆଗାମୀ ଦିନରେ ଏପରି ଯଦି ଲାଗିରହେ ତେବେ ସମ୍ପୂର୍ଣ୍ଣ ଭାବେ କପା ଚାଷ ପ୍ରତି ଚାଷୀ ମୁହଁ ଫେରାଇ ନେବ ଏଥିରେ ସନ୍ଦେହ ନାହିଁ । ଏନେଇ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ କହିଛନ୍ତି ଯେ ଏହାର ଯଥାଯଥ ସମାଧାନ ପାଇଁ ଆମେ ଚେଷ୍ଟା କରିବା ସହ ଜିନିଙ୍ଗ୍ ମିଲ୍ ପାଇଁ ଆମେ ସରକାରଙ୍କୁ ଜଣାଇବୁ ।