#କରୋନା_ପାଇଁ_ରେଗୁଲେସନ୍ସ_ଜାରି ଭୁବନେଶ୍ୱର : ରାଜ୍ୟରେ ଜଣେ ବି କରୋନା ପଜେଟିଭ୍ ରୋଗୀ ଚିହ୍ନଟ ହୋଇନଥିଲେ ସୁଦ୍ଧା ରାଜ୍ୟ ସରକାର ଯୁଦ୍ଧକାଳୀନ ଭିତ୍ତିରେ ଏହି ଭାଇରସର ମୁକାବିଲା ପାଇଁ ପଦକ୍ଷେପ ନେଇଛନ୍ତି। ମହାମାରୀ ଆଇନ-୧୮୯୭ର ଧାରା ୨,୩,୪ରେ ପ୍ରଦତ୍ତ କ୍ଷମତା ଆଧାରରେ ଓଡ଼ିଶା ସରକାର ଆଜି କରୋନା ଭାଇରସର ନିୟନ୍ତ୍ରଣ ଓ ପ୍ରତିଷେଧକ ନିମନ୍ତେ ସ୍ୱତନ୍ତ୍ର ରେଗୁଲେସନ୍ସ ଜାରି କରିଛନ୍ତି। ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ ଜାରି ‘ଓଡ଼ିଶା ସିଓଭିଆଇଡି-୧୯ ରେଗୁଲେସନ୍ସ-୨୦୨୦’ ଅନ୍ତର୍ଗତ ସମସ୍ତ ଜିଲ୍ଲାପାଳ, ମ୍ୟୁନିସପାଲଟି କମିଶନର, ସ୍ୱାସ୍ଥ୍ୟ ନିର୍ଦ୍ଦେଶକମାନଙ୍କୁ କରୋନା ଭାଇରସ୍ ବ୍ୟାପିବାକୁ ବନ୍ଦ କରିବା ଦିଗରେ ଆବଶ୍ୟକ ପଦକ୍ଷେପ ନେବା ପାଇଁ କ୍ଷମତା ନ୍ୟସ୍ତ କରାଯାଇଛି।
ଏହାସହିତ ଗାଇଡଲାଇନରେ ସ୍ପଷ୍ଟ କୁହାଯାଇଛି ଯେ, କିଓଭିଆଇଡି-୧୯ ଭାଇରସର ପରୀକ୍ଷା କୌଣସି ଘରୋଇ ଲ୍ୟାବରେ କରାଯାଇ ପାରିବ ନାହିଁ। ପ୍ରତ୍ୟେକ ଘରୋଇ ସ୍ୱାସ୍ଥ୍ୟ ଅନୁଷ୍ଠାନ ଏହି ପରୀକ୍ଷା କରିବାକୁ ଚାହିଁଲେ ତା’ର ନମୂନାକୁ ଆଇଏସଡିପିକୁ ଜଣାଇବେ। ଜିଲ୍ଲାପାଳ ଓ ମ୍ୟୁନିସପାଲଟି କମିଶନର ନିଜର ପରିସୀମା ମଧ୍ୟରେ ଏହି ଭାଇରସକୁ ରୋକିବା ନିମନ୍ତେ ଯେକୌଣସି ଆବଶ୍ୟକ ପଦକ୍ଷେପ ନେବାକୁ କ୍ଷମତାପ୍ରାପ୍ତ ଅଟନ୍ତି। ଯଦି କୌଣସି ବ୍ୟକ୍ତି ଭାଇରସ୍ ସଂକ୍ରମଣ ସମ୍ପର୍କରେ ଲୁଚାଇବେ ଅବା କୌଣସି ସୂଚନା ନଦେବେ ତାଙ୍କ ବିରୁଦ୍ଧରେ ଦଣ୍ଡନୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ପ୍ରାବଧାନ ରହିଛି।
କରୋନା ଭାଇରସ ବ୍ୟାପିବା ରୋକିବା ନିମନ୍ତେ ପ୍ରଭାବିତ ଅଞ୍ଚଳକୁ ଲୋକଙ୍କ ପ୍ରବେଶ ଉପରେ କଟକଣା ଜାରି ସହ ସ୍କୁଲ, ଅଫିସ, ସିନେମା ହଲ୍, ସୁଇମିଂ ପୁଲ, ଜିମ୍ ଓ ଜନଗହଳି ହେଉଥିବା ଉତ୍ସବକୁ ବନ୍ଦ କରିବାକୁ ପରାମର୍ଶ ଦିଆଯାଇଛି। ରାଜ୍ୟ ସରକାର ଜାରି କରିଥିବା ଏହି ରେଗୁଲେସନ୍ ମିଶନ ମୋଡରେ ତତ୍କାଳ ପ୍ରଭାବରୁ କାର୍ଯ୍ୟକ୍ଷମ ହୋଇଛି ଓ ଏହା ବର୍ଷକ ପର୍ଯ୍ୟନ୍ତ ବୈଧ ରହିବ ବୋଲି କୁହାଯାଇଛି।