#ଶେଷରେ_ନିର୍ଭୟାଙ୍କୁ_ନ୍ୟାୟ_ମିଳିଲା ନୂଆଦିଲ୍ଲୀ : ଶେଷରେ ୭ ବର୍ଷ ପରେ ନିର୍ଭୟାଙ୍କୁ ମିଳିଛି ନ୍ୟାୟ । ଫାଶୀ ଖୁଣ୍ଟରେ ଝୁଲିଲେ ଚାରି ଅପରାଧି। ସାତ ବର୍ଷ ପୂର୍ବେ ସମଗ୍ର ଦେଶକୁ ମର୍ମାହତ କରିଥିବା ନିର୍ଭୟା ଘଟଣାର ଚାରି ଦୋଷୀଙ୍କୁ ଶେଷରେ ଦଣ୍ଡ ମିଳିଛି । ଦୀର୍ଘ ସାତ ବର୍ଷ ତିନି ମାସର ପ୍ରତୀକ୍ଷା ପରେ ନିର୍ଭୟା ଓ ତାଙ୍କ ପରିଜନଙ୍କୁ ନ୍ୟାୟ ମିଳିଛି । ଫାଶୀ ଦେବାର ଶେଷ ମୁହୂର୍ତ୍ତ ପର୍ଯ୍ୟନ୍ତ ଜାରି ଆଇନର ଜଟିଳତା ପରେ ବି ନିର୍ଭୟାର ଚାରି ଦୋଷୀ ଅକ୍ଷୟ, ପବନ, ମୁକେଶ ଓ ବିନୟକୁ ଶୁକ୍ରବାର ସକାଳ ୫ଟା ୩୦ରେ ଫାଶୀ ଦିଆଯାଇଛି । ଫାଶୀ ପୂର୍ବରୁ କେବଳ ବିନୟ ଏବଂ ମୁକେଶ ଖାଦ୍ୟ ଗ୍ରହଣ କରିଥିଲେ। କିନ୍ତୁ ପୱନ ଏବଂ ଅକ୍ଷୟ ଏଥିରେ ଅମଙ୍ଗ ହୋଇଥିଲେ। ଦୋଷୀଙ୍କ ଓକିଲ ଏପି ସିଂହ ଅଭିଯୋଗ ଆଣିଥିଲେ ଯେ, ପରିବାର ଲୋକଙ୍କ ସହ ଦୋଷୀଙ୍କ ଭେଟ କରାଯାଉନି। କିନ୍ତୁ ଫାଶୀ ପୂର୍ବରୁ ହିଁ ମୁକେଶର ପରିବାର ଲୋକେ ତାଙ୍କୁ ଭେଟିଥିଲେ। ଫଶୀ ପୂର୍ବର ରାତି ୪ ଦୋଷୀଙ୍କ ପାଇଁ ସବୁଠାରୁ ଭୟଙ୍କର ରାତି ଥିଲା। ଭୟରେ ସେମାନଙ୍କୁ ନିଦ ମଧ୍ୟ ଆସିନଥିଲା। ସେମାନଙ୍କୁ ଜଳଖିଆ ଯଚା ଯାଇଥିଲେ ମଧ୍ୟ, ସେମାନେ ମନା କରିବାରୁ ସେମାନଙ୍କୁ ଅଲଗା ଅଲଗା ୱାର୍ଡରେ ରଖା ଯାଇଥିଲା। ଜଣଙ୍କୁ ୧ ନମ୍ବର ୱାର୍ଡ, ଜଣଙ୍କୁ ୭ ନମ୍ବର ୱାର୍ଡ ଏବଂ ଅନ୍ୟ ଦୁଇ ଜଣଙ୍କୁ ୮ ନମ୍ବର ୱାର୍ଡରେ ରଖାଯାଇଥିଲା।
ସେମାନଙ୍କ ଉପରେ କଡ଼ା ନଜର ରଖାଯାଇଥିଲା। ସେପଟେ ଫାଶୀ ଦେବାକୁ ଥିବା ଜହ୍ଲାଦ ପୱନ୍ ମଧ୍ୟ ଜେଲରେ ଫାଶୀ ମୁହୂର୍ତ୍ତକୁ ଅପେକ୍ଷା କରି ରହିଥିଲା। ରାତି ୪ଟା ବେଳକୁ ଫାଶୀ ପ୍ରକ୍ରିୟା ଆରମ୍ଭ ହୋଇଥିଲା। ସର୍ବ ପ୍ରଥମେ ଜେଲ୍ ଅଧିକାରୀ ୪ ଦୋଷୀଙ୍କ ପାଖରେ ପହଞ୍ଚି ଦୋଷୀଙ୍କୁ ଗାଧୋଇବା ପାଇଁ ଏବଂ ପ୍ରାର୍ଥନା ପାଇଁ କହିଥିଲେ। କିନ୍ତୁ ସେମାନେ ଏପରି କରିବାକୁ ମନା କରିଥିଲେ। ଏହାପରେ ୫ଟା ବେଳକୁ ଫାଶୀର ଅନ୍ତିମ ପ୍ରକ୍ରିୟା ଆରମ୍ଭ ହୋଇଥିଲା। ଦୋଷୀଙ୍କୁ କଳା କପଡ଼ା ପିନ୍ଧା ଯାଇଥିଲା। ପୁରା ଜେଲ୍କୁ ଲକ୍ଡାଉନ୍ କରାଯାଇଥିଲା। ବାହାରେ ଅର୍ଦ୍ଧ ସାମରିକ ବାହିନୀ ମୁତୟନ କରାଯାଇଥିଲା। ଶେଷରେ ତିହାର ଜେଲ୍ ଡିଜି ମଧ୍ୟ ପହଞ୍ଚିଯାଇଥିଲେ।
ଏଥର ୪ ଜଣଙ୍କ ଗଳାରେ ଫାଶୀ ପିନ୍ଧାଇ ଦିଆଯାଇଥିଲା। ଏହା ପରେ ପରେ ହ୍ୟାଣ୍ଡଲ ଭିଡ଼ି ଦିଆଯାଇଥିଲା। ଫଳରେ ୪ ଜଣ ଦୋଷୀଙ୍କ ପ୍ରାଣବାୟୁ ଉଡ଼ିଯାଇଥିଲା। ୩୦ ମିନିଟ୍ ଯାଏ ଏହି ୪ ଜଣଙ୍କ ଶରୀର ଝୁଲି ରହିଥିଲା। ୬ଟା ବେଳକୁ ଏମାନଙ୍କ ଶରୀର ଯାଞ୍ଚ କରାଯାଇଥିଲା। ଶେଷରେ ବିଧିବଦ୍ଧ ଭାବେ ଡାକ୍ତର ପବନ, ଅକ୍ଷୟ, ବିନୟ ଏବଂ ମୁକେଶକୁ ମୃତ ଘୋଷଣା କରିଥିଲେ। ପରେ ସେମାନଙ୍କର ବ୍ୟବଚ୍ଛେଦ କରାଯିବା ପରେ ସେମାନଙ୍କର ଶବକୁ ପରିବାର ବର୍ଗଙ୍କୁ ପ୍ରଦାନ କରାଯାଇଥିଲା ।
