#ନିଜାମୁଦ୍ଦିନ_ଧର୍ମୀୟ_କାର୍ଯ୍ୟକ୍ରମରେ_ଯୋଗ_ଦେଇଥିବା_୯_ମୃତ ନୂଆଦିଲ୍ଲୀ: ଲକଡାଉନ ପୂର୍ବରୁ ଦିଲ୍ଲୀର ନିଜାମୁଦ୍ଦିନ ଠାରେ ଥିବା ମରକାଜ ମସଜିଦରେ ଆୟୋଜିତ ଧର୍ମୀୟ କାର୍ଯ୍ୟକ୍ରମକୁ ନେଇ ଏବେ ସାରା ଦେଶରେ ହଇଚଇ ସୃଷ୍ଟି ହୋଇଛି। ଏହି କାର୍ଯ୍ୟକ୍ରମରେ ଯୋଗଦେଇଥିବା ୯୦ରୁ ଅଧିକ ଲୋକଙ୍କ ଶରୀରରେ କରୋନା ଭୂତାଣୁ ଠାବ ହେବା ଏବଂ ୪ ରାଜ୍ୟରେ ୯ ଜଣଙ୍କ ଜୀବନ ଯିବା ପରେ ଚାରିଆଡ଼େ ଆତଙ୍କ ଖେଳିଯାଇଛି। ଏହି କାର୍ଯ୍ୟକ୍ରମରେ ୨୮୦ରୁ ଅଧିକ ବିଦେଶୀ ନାଗରିକଙ୍କ ସହ ଦେଶର ବିଭିନ୍ନ ରାଜ୍ୟରୁ ପ୍ରତିନିଧିମାନେ ଯୋଗଦେଇଥିଲେ। ତେଣୁ ସେମାନଙ୍କୁ ଠାବ କରିବା ପାଇଁ ସାରା ଦେଶରେ ଜୋରଦାର ସର୍ଚ୍ଚ ଅପରେସନ ଆରମ୍ଭ ହୋଇଛି। ସୂତ୍ରରେ ମସଜିଦ କାର୍ଯ୍ୟକ୍ରମରେ ଯୋଗଦେଇଥିବା ତାମିଲନାଡୁରେ ୫୭, ତେଲେଙ୍ଗାନାରେ ୧୫ ଓ ଦିଲ୍ଲୀରେ ୨୪ ଜଣ ଏଯାଏ କରୋନାରେ ଆକ୍ରାନ୍ତ ହୋଇଥିବା ଜଣାପଡ଼ିଛି।
ତବଲିଗ ଜାମାତ ଗ୍ରୁପ୍ର ମୁଖ୍ୟାଳୟ ହେଉଛି ମରକାଜ ନିଜାମୁଦ୍ଦିନ ମସଜିଦ। ଏଠାରେ ୧ରୁ ୧୫ ଯାଏ ଏକ ଧର୍ମୀୟ କାର୍ଯ୍ୟକ୍ରମ ଆୟୋଜନ ହୋଇଥିଲା। ରବିବାର ରାତିରେ ଏଠାରେ ରହୁଥିବା କିଛି ଲୋକଙ୍କ ଶରୀରରେ କରୋନା ଭୂତାଣୁ ଥିବା ଲକ୍ଷଣ ଦେଖାଦେଇଥିଲା। ଫଳରେ ପୁଲିସ ଓ ଅର୍ଦ୍ଧ ସାମରିକ ବାହୀନି ପୂରା ଅଞ୍ଚଳକୁ କର୍ଡନ କରିଦେଇଥିଲେ। ଏପରି ସ୍ଥିତିରେ ଏଠାରେ ଆୟୋଜିତ କାର୍ଯ୍ୟକ୍ରମରେ ଯୋଗଦେଇଥିବା ଦିଲ୍ଲୀର ୨୪ ଜଣଙ୍କ ଶରୀରରେ କରୋନା ଭୂତାଣୁ ଠାବ ହୋଇଥିଲା। ସେହିପରି ତେଲେଙ୍ଗାନାରେ ୬ ଜଣ ପ୍ରାଣ ହରାଇଥିଲେ। ଫଳରେ ଗତକାଲି ରାତିରେ ପୁଲିସ୍ ଏଠାରେ ଥିବା ୩୦୦ରୁ ଅଧିକଙ୍କୁ କରୋନା ସନ୍ଦିଗ୍ଧରେ ହସ୍ପିଟାଲକୁ ନେଇଥିଲା। ସେହିପରି ଆଜି ଏହି ମସଜିଦ୍କୁ ସିଲ୍ କରାଯିବା ସହ ୮୫୦ ଜଣକୁ ବସ୍ରେ ନିଆଯାଇ ସହରର ବିଭିନ୍ନ ସ୍ଥାନରେ କ୍ୱାରେଣ୍ଟାଇନ୍ରେ ରଖାଯାଇଛି।
ଏହି ଘଟଣାକୁ କେନ୍ଦ୍ର କରି ପୁଲିସ୍ ମସଜିଦ କର୍ତ୍ତୃପକ୍ଷଙ୍କ ବିରୋଧରେ ମାମଲା ରୁଜୁ କରିଛି। ସେହିପରି ବିଭିନ୍ନ ରାଜ୍ୟର ସରକାରମାନେ ନିଜାମୁଦ୍ଦିନ କାର୍ଯ୍ୟକ୍ରମରେ ଯୋଗଦେଇଥିବା ଲୋକଙ୍କୁ ଖୋଜିବା ମଧ୍ୟ ଆରମ୍ଭ କରିଛନ୍ତି। । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ କାର୍ଯ୍ୟକ୍ରମ ଆୟୋଜନ କରୁଥିବା କର୍ତ୍ତୃପକ୍ଷଙ୍କୁ ସମସ୍ତ ଦୋଷ ଦେଇଛନ୍ତି। ଏଥିସହ ଏହା ଏକ ଦାୟିତ୍ୱହୀନ କାମ ଓ ୪୪୧ ଜଣଙ୍କୁ ମସଜିଦରୁ ବାହାର କରି ହସ୍ପିଟାଲରେ ଭର୍ତ୍ତି କରାଯାଇଛି ବୋଲି ସେ କହିଛନ୍ତି।
