#ଭାରତ_ଓ_ଚୀନ_ମଧ୍ୟରେ_ରକ୍ତାକ୍ତ_ସଂଘର୍ଷ_୨୦_ଭାରତୀୟ_ଯବାନ_ସହିଦ ନୂଆଦିଲ୍ଲୀ: ଭାରତ ଓ ଚୀନ ମଧ୍ୟରେ ସୋମବାର ରାତିରେ ସଂଘର୍ଷରେ ପ୍ରଥମେ ୩ ଜଣ ଯବାନସହିଦ ହୋଇଥିବା ଓ ୪ରୁ ୫ ଜଣ ଚୀନ ସେନା ମଧ୍ୟ ଏହି ସଂଘର୍ଷରେ ମୃତ୍ୟୁବରଣ କରିଥିଲେ । ମାତ୍ର ଏହି ସଂଖ୍ୟା ଯଥେଷ୍ଟ ଅଧିକ ବୋଲି ସୂଚନା ମିଳିଛି । ସମ୍ବାଦ ସରବରାହ ସଂସ୍ଥା ଏଏନ୍ଆଇ ସୂଚନା ଅନୁସାରେ ଭାରତ ପକ୍ଷରୁ ୨୦ ଜଣ ଯବାନ ସହିଦ ହୋଇଥିବା ବେଳେ ଚୀନ ପକ୍ଷରୁ ୪୩ ଜଣ ଯବାନ ମୃତାହତ ହୋଇଥିବା ଜଣାପଡ଼ିଛି । ତେବେ ଭାରତୀୟ ସୈନିକଙ୍କ ମୃତ୍ୟୁ ସଂଖ୍ୟା ଆହୁରି ବଢ଼ିବାର ଆଶଙ୍କା ରହିଛି।ଭାରତୀୟ ସେନା ପକ୍ଷରୁ ଜାରି ଇସ୍ତାହାରରେ କୁହାଯାଇଛି, ଚୀନ ସେନା ସହ ସଂଘର୍ଷ ଘଟଣାରେ ୧୭ ଜଣ ଯବାନ ଗୁରୁତର ହୋଇଥିଲେ। ଲଦାଖର ଗଲଓ୍ଵାନ ଉପତ୍ୟକାରେ ତାପମାତ୍ରା ଶୂନଠାରୁ କମ୍ ଥିବା ସହ ଏହା ସମୁଦ୍ରପତ୍ତନଠାରୁ ବହୁ ଉଚ୍ଚରେ ଅବସ୍ଥିତ ହୋଇଥିବାରୁ ଏହି ଆହତ ଯବାନମାନେ ଅସୁସ୍ଥ ହୋଇ ମୃତ୍ୟୁବରଣ କରିଛନ୍ତି। ଏହା ଫଳରେ ମୃତ୍ୟୁ ସଂଖ୍ୟା ୨୦କୁ ବଢ଼ିଛି।
ଏଥିସହ ସେନା ପକ୍ଷରୁ କୁହାଯାଇଛି ଯେ ସୋମବାର ରାତିରେ ଗଲୱାନ ଉପତ୍ୟକାର ଯେଉଁଠାରେ ଭାରତୀୟ ଓ ଚୀନ ସେନା ପରସ୍ପରର ସହ ମୁହାଁମୁହିଁ ହୋଇଥିଲେ ଓ ଘଟଣା ରକ୍ତାକ୍ତ ସଂଘର୍ଷରେ ପରିଣତ ହୋଇଥିଲା, ଏବେ ସେ ସ୍ଥାନରୁ ଚୀନର ସୈନିକମାନେ ହଟିଯାଇଛନ୍ତି। ଦେଶର ସାର୍ବଭୌମତ୍ୱ ଓ ଅଖଣ୍ଡତାକୁ ରକ୍ଷା କରିବାକୁ ଭାରତୀୟ ସେନା ବଦ୍ଧପରିକର।ସୋମବାର ରାତିରେ ଲଦାଖର ଗଲଓ୍ଵାନ ଉପତ୍ୟାକାରେ ଭାରତ ଓ ଚୀନ ସେନା ମଧ୍ୟରେ ହୋଇଥିବା ହିଂସାତ୍ମକ ସଂଘର୍ଷରେ ଭାରତୀୟ ସେନାର ୨ ଯବାନ ହାବିଲଦାର କେ.ପାଲାନି ଓ ସୁନୀଲ କୁମାର ଓଝାଙ୍କ ସମେତ ଜଣେ କର୍ଣ୍ଣେଲ ସନ୍ତୋଷ ବାବୁ ସହିଦ ହୋଇଥିଲେ ବୋଲି ଭାରତୀୟ ସେନା ପକ୍ଷରୁ ସୂଚନା ଦିଆଯାଇଥିଲା । ସେହିପରି ଚୀନ ପକ୍ଷର ୫ ସୈନିକ ମୃତ୍ୟୁବରଣ କରିଥିବା ଚୀନ ଗଣମାଧ୍ୟମ ପ୍ରକାଶ କରିଥିଲା । ମାତ୍ର ଏହି ସଂଖ୍ୟା ବଢ଼ିବ ବୋଲି କୁହାଯାଇଥିଲା।